Meri Gali – मेरी गली – hindi poem – rahulrahi

Jabse aankhe hai khuli,
badh gae mere kadam,
yaar paae khub saare,
aur paai ek gali.

roz usase hi guzarkar,
subah aankho ko masalkar,
jata tha school main,
saare darwaaze the band,
Ta-Ta kahe meri gali.
_fir laut kar jab aau toh,
saare mere jo aas paas,
vyast apne kamo me,
baahe wo kholi thi khadi,
apni lagi meri gali.

upar likha jo taam-jhaam,
ye toh tha aadhe din ka kaam,
jaise hi hoti shaam wo,
hote ikattha yaar wo,
kheli hamare sang-sang,
apne hi dhang meri gali.
_par jab kabhi hoti ladai,
zor-khicha-taan bhi,
dekhkar chillati thi,
roti bhi thi jaise ke maa,
khamosh bhi ho jaati thi,
hokar udaas meri gali.

har saal holi aati hai,
rang jaate hai chehre,
unse lipat kar unme hi,
rang jaati hai wo baavari,
jab bhi diwali aati hai,
dulhan si wo saj jaati hai,
itne jano ki bhid me,
tanha pali meri gali.